مليت من الســــــــآلة

السآلة: هي الغلاظة أو الغلاسة أو ثقل الدم.
في واحد سئيل كتير ، يعني إذا بضل من هلق لبكرا عم بوصف قديش هو سئيل صدقوني ما بخلص، وهذا الشخص بيتمتع بميزة تانية وهي أنه ما بيعرف يكتب كلمتين عربي على بعض بدون 100 غلط نحوي وإملائي. أكتر شي بيضحكني هو أنه قال يعني حاططني بباله وناوي يجاكرني. مو عرفان أنو إذا بدي اتسائل عليه بساويه مسخرة للي رايح ويلي جاية.
هيك قال.
طيب …
أنا شخصياً ليش عم عاني كتير من السآلة يلي منتشرة هاليومين وين ما رحت ووين ما اجيت؟؟
طيب شو الحل؟؟
يعني كيف الواحد بدو يكافح السآلة؟؟
طيب متل هذا السئيل يلي حكينا عنه، شو بيعمل الواحد ليخلص من سآلتو؟؟
علماً هو سئيل لدرجة متل العلكة لما تعلق بالشعر.

في قصة كتير بحب اذكرها لما لاقي واحد سئيل.
أحداث القصة بتدور بالمحكمة بيسأل القاضي المتهم: يا ابني ليش قتلتو؟
بيجاوبه المتهم: لأنو سئيل يا سيدي.
بيقله القاضي: طيب سئيل بس ليش قتلتو
المتهم: يا سيدي عم قلك سئيييييييييل، والله سئيييييييل
القاضي: والله فهمت أنه سئيل بس ليش قتلتو؟
المتهم: لك سئيل سئييييييل، ليش ما عم تفهم عليي أنه سئيل
المهم بعد هالقصة السئيلة، لهلق ما حدا فكر كيفية التخلص من السآلة.

أنا بحمد الله إني مالي بنت، ليش؟ لأني بشوف قديش الشباب بيتسائلوا عليهم، لآ وبيفكروا حالهم الشباب السئيلين أنهم مهضومين وأنه البنات حبوهم.
مرة كنت ماشي بالطريق، وكان في صبية عم تقطع الشارع، وإذ بتمرق طرطيرة تلات دواليب موديل الشبح، فيها ستة ركاب. صار السائق يزمر للبنت والشباب يلي بالطرطيرة صار الشاطر منهم يلي بدو يقول شي تعليق سئيل. وبعد ما مرقوا كنت رح موت من السآلة قام سمعت واحد منهم عم يقول للتاني: شوف شلون ضحكت لي”؟؟؟؟!!!!!!
ضحكت له، أي حط لي خطين تحت ضحكت له، يعني إذا أنا متت من سآلتو شلون هي بدها تضحك له؟
على كل ما علينا بنرجع بنشوف طلع معكم شي لمكافحة السآلة؟
ما في شي …

بمسرحية لـ زياد الرحباني بيقول فيها:
البلد لازم يتخلص من سئيلو الشعب ما عاد يتحمل سآلة

يسلم تمك يا أبو الزوز، بزمتي إنك معلم.
يعني لخص كل المعاناة من السآلة ببيت شعري واحد.
صحيح سمعتوا الإعلان رقم 3 تبع زياد رحباني؟؟؟

وقت بروح عالبيت بمسك الريموت وبقلب بهالقنوات الفضائية، إذا فتحت على قناة أغاني بيطلع لي كل السآلة يلي بالعالم، وإذا قلبت على قناة مسلسلات بيطلع لي مسلسل مكسيكي سئيل من هدول تبع 4000 حلقة من السآلة. وإذا فتحت على قناة إخبارية بينط لي الضفدع كامل ونعمان (جنبلاط والحريري) بيموتوني من السآلة وهم كل واحد فيهم مفكر حاله أدولف هتلر عم يخطب بالأمة الألمانية.
على فكرة الحريري بيذكرني بالسئيل يلي حكيت عنه أول شي.

يعني لهلق ما طلع معكم شي حل للتخلص من السآلة والسئيلين؟!
طيب أنا رح قلكم شو الحل يلي عم بتبعه أنا.
الحل هو ببساطة السآلة، أي السآلة مالكم غيرها، يعني الدواء من نفس الداء. لأنو السئيل بيموت وقت حدا يتسائل عليه، مو هو هوايته يخلي العالم تموت من سآلته، طيب تسائل أنت عليه وشوف شو بيصير فيه.

بنرجع للسئيل يلي حكيت عنه أول شي، هلق أنا رح صير اتسائل عليه. وعن جد بدي عقده، بدي طلع كل معاناتي مع السآلة عليه. يعني رح اتسائل عليه أضعاف سآلته.
احزروا شو؟ يا ترى إذا قرأ هالمقالة رح يفهم أنها بتحكي عنه؟
لأنه متل ما قلت لكم هو عنده مشكلة مع اللغة
يييييييي الله ياخدو شو سئيل، كمان ما بيفهم عربي
بعد هالمقالة السئيلة بتمنى تكونوا قدرتوا تلاقوا حل للسآلة تشاركوني فيه.

بانتظار تعليقاتكم تحت شعار السآلة أولاً
وشكراً